「言論自由是基本人權」，這tī今仔日ê台灣社會聽起來kán-ná無啥問題。人一出世，ē-hiáu喘氣，通過喙kap鼻仔發出聲音，表達心意；通過手kap腳以及身體ê行動，表達感受；nā ē-hiáu畫圖書寫，tō ē-tàng用圖kap文字來表達觀念kap創意；kàu-tī今仔日，社群影音媒體kap電信，hō͘人thang利便交流思想kap保存信息。Nā sī言論無違犯機密、偽證、詐騙、毀謗、霸凌kap性侵害等等ê法律、無侵害其他ê人á-sī損害社會，言論通常無受禁止kap阻礙。

回想40冬前ê台灣kap人類ê歷史，言論毋是自由。秦帝國（主前3世紀）kā冊燒掉，kā讀冊ê人活埋。中華人民共和國1984年6月初4 tī天安門屠殺發表異議ê學生，到今仔日，中國人beh連網路到國外koh需要『翻牆』。台灣tī中國國民黨威權統治ê時期，雷震因為批評蔣介石連任總統是違反憲法致到受關（1960年），400萬字ê《回憶錄》手稿hō͘中國國民黨政府燒掉（1988年）。《台灣教會公報》1825期刊載二二八事件40週年紀念，受警備總部查禁（1987年）。鄭南榕主張百分之百言論自由kap台灣獨立，1989年4月初8，警察包圍自由時代雜誌社，鄭南榕tī雜誌社自焚。中華民國當時ê刑法第100條，「意圖」（tī頭殼內底想）beh分裂（台獨）éng-kòe中國國民黨政府所定ê國土範圍（包含1924年就獨立ê蒙古人民共和國），就會受判七年徒刑。Mi̍h ē-sái lām-sám chia̍h, ōe bē-sái lām-sám kóng。

Nā講西方世界，tio̍h講起羅馬帝國基督教化，基督教會帝國化。帝國利用基督教來控制地方勢力，驅逐異端、十字軍東征、認定科學kap文藝是邪惡甚至死罪，用宣教ê名義四界殖民，殘害美洲、非洲、亞洲kap大洋洲ê人民，chún-kóng無法度完全控制殖民地人民ê思想，mā必須hō͘殖民地ê人民因為反對ê言論kap觀念受苦楚、甚至喪失性命。

Nā sī講人類beh繼續享受言論自由，逐時代kap逐所在ê人民tio̍h saⁿ-kap扶持，m̄-thang pàng-gōa-gōa。關係言論自由，基督教有啥款ê貢獻？是負面á-sī正面？聖經是支持á-sī反對？

基督教ùi耶穌基督開始。耶穌ê門徒宣教初期kap猶太教以及其他ê宗教競爭，衝擊羅馬帝國ê社會價值，hit-tang-chūn基督教受迫害，不時有基督徒殉道，是「無合法」ê宗教，mā無一統ê信仰組織kap經典。K

hah出名ê派別有亞歷山大派、安提阿派、強調靈智ê諾斯底主義、認為耶穌是幻影ê馬吉安教派，mā ū強調異象、靈恩kap殉道ê孟他努主義者等等。多元ê基督教信仰表達，這本身就顯明言論多元，tī濟濟宗教信仰中間提供基督教ê信仰觀點。一統地中海世界ê羅馬帝國認定基督教是異端。基督教tī羅馬帝國以外，提供上帝國這項選擇，無拜羅馬皇帝，獨尊耶穌基督是萬主ê主。羅馬帝國有階層，ùi頂層ê凱撒皇帝、政府官員、公民到低層ê奴隸，階層分明。基督教提倡：beh做頭人–ê tio̍h服事微細ê，tāi-ke攏是兄弟姊妹，違反階級意識。Tī自高、自大、自私、自利ê人性kap社會中間，基督教宣揚「Chi̍t ê chi-thé siū-khó͘, kî-tha ê chi-thé chiū chòe-hé siū-khó͘」ê博愛論述。

主後313年，君士坦丁大帝ê《米蘭敕令》hō͘基督教成做合法ê信仰，總是，教會mā漸漸帝國化。無論是帝國thong-kòe教會á-sī教會thong-kòe帝國teh控制教會kap社會，對信仰ê言論是tēⁿ-tiâu-tiâu。325年，教會當局制定尼西亞信經，kā無接受三位一體論ê亞留派趕出去；koh確立聖經正典；無論主張是beh減少á-sī beh增加現有聖經內面ê經冊，攏受排除；統合kap擴展教會組織，強化主教ê權柄，監視kap管控信仰言論，beh影響帝國ê社會價值。比論講，無beh參加十字軍東征ê國王，教會就講伊是基督ê對敵。異端裁判所會kā受判斷做異端邪說ê人禁言、罰錢、鞭打、關監，甚至放火燒死。哥白尼kap伽利略關係地球tòe日頭teh tńg-se̍h ê論述成做禁冊，伽利略hông軟禁。丁道爾kā聖經翻譯做英語，受判火刑。笛卡爾提倡「我思考所以我tī-leh」、叫人對逐項代誌tio̍h「普遍懷疑」ê相關論述攏成做禁冊。洛克主張「上帝hō͘人有天生就有ê權力」，伊反對「君權是上帝授權」(彼時ê教會當局khah贊成王權是上帝直接hō͘王ê，王kan-taⁿ對上帝負責），伊ê著作是禁冊。另外，主張「全民契約論」、理念啟發法國大革命、人權宣言kap美國獨立宣言ê盧梭ê冊mā是禁冊。當時ê教會當局傾向支持政府控制言論。

Sui-bóng是按呢，教會基層ê修士kap信徒勇敢根據信仰來見證真理。上有影響力ê見證就是宗教改革。改革宗主張獨獨聖經是信仰kap生活ê準則，限縮教會kap牧者ê權柄，主張牧師kap長老ê合議制度，而且教派分立，phah-phòa教會一統、教權是少數人kui-óaⁿ-phâng ê現象，建立言論自由ê開闊空間，民主、憲政、人文kap科學大發展。

教會ê基本信仰根據是聖經。Nā sī直接讀聖經，咱chhōe無「言論自由」這款ê文字，hoán-tńg對言論ê制限bōe-chió。聖經中間有濟濟誡命、律例kap典章，tī十條誡ê中間，有濟濟「m̄-thang」。「我以外你m̄-thang有別個上帝。M̄-thang為家己雕刻偶像……。M̄-thang濫用上主 — 你ê上帝ê名。M̄-thang害死人。M̄-thang姦淫。M̄-thang偷提。M̄-thang作偽證陷害你ê厝邊。M̄-thang貪你ê厝邊ê厝，嘛m̄-thang貪你ê厝邊ê某、奴僕、女婢、牛、驢，抑是你ê厝邊任何ê物件。」 親像按呢，言論tio̍h遵行誡命，毋是hiah-nī-á「自由」（出埃及記20章3～17節）。

關係「M̄-thang害死人」，耶穌ê解釋是：「M̄-kú我kā恁講，對兄弟抑是姊妹發受氣，攏tio̍h受審判。無論什麼人罵兄弟抑是姊妹『廢人』，tio̍h chiūⁿ法庭；罵兄弟抑是姊妹『tòng-gōng』，tio̍h受地獄ê火燒。」（馬太福音5章22節）耶穌講，罵兄弟姊妹親像彼款ê言論就是害死人。

耶穌koh講：「M̄-sī tùi 嘴入去ê hō͘人無清氣，是tùi嘴出來ê chiah hō͘人無清氣。」（15章11節）「恁kiám bô了解，所有對嘴入ê攏入去腹肚內，後來pàng lo̍h-khì 便所？Tùi嘴出來ê是tùi心出，che chiah ōe hō͘ 人無清氣。因為tùi心出來ê有歹念頭、凶殺、私通、姦淫、偷提、偽證，kap誹謗。Chiah-ê chiah ōe hō͘ 人無清氣；無洗手就食飯，bōe hō͘人無清氣。」（15章17～20節）Tùi chia咱thang chai-iáⁿ，聖經對言論有道德要求，禁止人用言論傷害人。

聖經對言論ê禁止kap管制，其實是對上帝來ê規範kap處理。萬物是伊所創造，言語kap受造–ê有運用言語ê氣力lóng出tī上帝。因為按呢，上帝有權規定言語kap處置違背ê人。Chia-ê規範kap處置有道德性質，是因為上帝本身ê神性是慈愛、公義、聖潔kap信實。殘忍、偏私、lah-sap kap虛假ê言行舉止，是悖逆上帝kap違背上帝ê規範。

聖經對言論有制限，總是聖經mā講上帝是言論自由ê源頭。創世記第1章描寫宇宙萬物ê創造是出tī上帝所講ê話。約翰福音第1章1～4節寫：「創世以前就有道，道kap上帝同在，道是上帝。伊tī創世以前就kap上帝同在。上帝thong-kè 伊創造萬有；一切被造ê逐項攏是thong-kè道來創造。tī伊內面有活命；chit-ê活命是人類ê光。」道，希臘文logos，thang翻譯做話語、理智、論述。人用話語來思想、用話語來交通。人因為話語來歡喜、受氣、悲哀kap快樂。言論自由ê先決條件在tī有話語kap自由使用話語ê能力；話語kap自由使用話語ê能力是上帝ê創造，是上帝賞賜hō͘咱ê。活命tī道內面，言論自由bōe-tàng違背道，bōe-tàng tī基督以外。

聖經支持言論自由ê另外一个特色是「約」。聖經上大ê分類就是舊約kap新約，新約kap舊約ê共同用字就是約。約，hō͘人脫離「強ê提去食」（law of the jungle）ê情景，是文明真正ê內涵。約是對上帝開始。創世記第9章，咱看tio̍h全能ê上帝掌握萬物ê生存，總是伊kā代表武器ê弓khǹg tī天頂做khēng（虹），kap挪亞以及kui chiah船ê活物約束。上帝無beh用武力攏總thâi，伊是用立約來處理存在kap關係ê問題。出埃及記24章7節，上帝公告誡命律法，摩西讀hō͘大家聽，大家攏有同意，chiah hiù血立約，成做以色列人ê共同規範。這真近倚盧梭ê「全民契約論」ê觀點，thang講是現代國家憲法公約ê起源。用人來制定治理規範ê埃及kā以色列當做奴才。出埃及ê以色列告白上帝是主，形成有民權、憲政kap法治ê敬拜團契。人tit-tio̍h啟發，用言論交通，大家討論，你同意、我同意，而且ha̍h tī上帝ê旨意，就制定保護雙方自由、邊界kap秩序ê公約。

言論無自由，thong-siông是因為受權威制限。Tī聖經中間kám-ū挑戰權威ê言論？無辜ê耶穌受釘tī十架，大聲喉叫講：Góa ê Siōng-tè, góa ê Siōng-tè, lí siáⁿ-sū pàng-lī góa?（馬太福音27章46節）Che kiám-chhái sī teh 質問上帝。無辜ê約伯，家破人亡，kui身軀生瘡，koh hō͘朋友kā 伊lóe-mē，約伯講： 「恁是按怎親像上帝khún-pek 我？恁beh苦楚我到什麼時？我jōa-á-ni̍h向望將我ê話寫起來，記tī冊裡；用thih-chām-á(鐵鏨仔)刻tī石頭，用iân(鉛)灌注留到永遠。」（約伯記19章22～24節）

約伯kap上帝相爭辯論。上帝用天地萬物ê受造來kap約伯講起伊ê權能（38～41章），約伯回答：「上帝啊，你厲害，這有影，我前耳孔聽見你，今我ê目睭看見你。根據我無辜ê受難，我厭惡◇，tī這塵埃kap滅門災厄所產生ê hóe-hu，我遺憾◇。（42章6節，作者ê翻譯）後面兩个動詞無受詞，所以用◇表示。Nā照希伯來文ê平行語法，kā前兩句ê受詞「你」khǹg–lo̍h-khì，咱thang體會約伯ê苦痛kap伊心內ê不平，所以對上帝發受氣，kā上帝抗議。伊堅信上帝是公義ê，總是伊kap伊ê kiáⁿ-jî攏經驗不義。若是約伯無抗議，約伯就成做無論hông按怎舞mā無要無緊ê人，無認為上帝是公義ê，mā無相信上帝會用公義料理伊ê案件。Nā sī kā「你」khǹg–lo̍h-khì，約伯就是teh褻瀆上帝。約伯ê信仰表達顯明約伯對上帝ê體諒：「上帝是公義ê，m̄ chai-iáⁿ為怎樣，伊無隨時用公義判斷我ê案件，既然按呢，我就繼續khut tī pùn-sò-tui ê中間！」約伯要求公義，總是伊無behsiat-to̍k（褻瀆）上帝。撒但輸輸去。人類ê言論對權威ê挑戰thang到啥物程度？約伯記講，面對上帝，你thang親像約伯，上帝容允ê言論自由是到這款程度。

言論自由是基本人權。教會tī兩千外冬ê中間，bat殘害言論自由， mā bat對言論自由有貢獻。約略來講，教會高層khah傾向管制，信徒kap基層神職人員有貢獻kap見證。根據聖經，上帝是言論自由ê起頭，mā是制定規範–ê。Tī創造論kap拯救論，上帝創造人有言論kap言論自由ê能力；若是言論違反上帝ê規範、傷害其他ê人，上帝會處罰加害者，拯救受害者。上帝向望人脫離人食人、贏ê人kui óaⁿ chóng phâng ê墮落，向望人根據聖經來制定有公義神性ê約束，thang確保言論自由。Tī爭取公義ê時，上帝容許人kap伊爭辯。