《蠟筆小新：奇奇怪怪！我的妖怪假期》帶來ê哲學思考

阮ang向望我陪伊去看電影，beh 40歲ê伊，siōng kah-ì ê bàng-gah是クレヨン しんちゃん（華譯《蠟筆小新》。主角是5歲ê野原しんのすけ，以下簡稱A-sin）。電影開始進前，聽tio̍h人teh討論，啥物款ê人會去看啥物款ê電影？人kéng電影來看，電影mā kéng人看。日本今年ê電影院收入，名探偵コナン（華譯《名偵探柯南》）超過125億日票，ドラえもん（Doraemon）是45億日票，A-sin khah bô 柯南 ê cha̍p-hūn-chi̍t。有人分析講，柯南ê觀眾主要是40歲以下ê成年女性，欣賞phò-àn lia̍h-tio̍h pháiⁿ-lâng ê快樂，有chhui-lí（推理）ê趣味，koh親像Hollywood動作片hiah-nī-á chhiāng-chhiāng-kún，緊張koh bōe thoa-soa。Doraemon ê觀眾，ǹg-bāng kap主角野比のび太仝款，tit-tio̍h完全ê接納，雖罔hân-bān，總是身軀邊有一个啥物攏ē-hiáu ê Doraemon，幫贊伊解決人生大大細細ê困境。Án-ne，kah-ì A-sin ê leh？

真濟人對A-sin ê印象無好，講伊是kâu-gín-á，變鬼變怪，tiāⁿ-tiāⁿ kā kha-chhng （尻川）tián hō͘人看，看tio̍h súi ê查某gín-á就直接表示伊ê意愛，實在是kà pháiⁿ gín-á tōa-sè。生活tī日本這个非常對重規矩甚至束縛心靈ê社會，A-sin ê行為是荒唐koh無教養。這是A-sin ê作者想beh去挑戰–ê。總是，tī吵吵鬧鬧ê家庭日常中間，A-sin全家ê成員互相結連，將日本文化ê「繋がり」（つながり）kap「絆」（きずな）表現到極，來反抗社會ê束縛（しがらみ）。

今年ê戲齣teh講hioh-joa̍h ê sî-chūn，A-sin全家tńg-khì阿公（野原銀之介）ê故鄉秋田beh參加煙火大會，bô-gî-gō͘，in進入妖怪村，這个村是妖怪國ê入口，人bē-tàng入去，人若入去，河童就會用khoe-sìⁿ（葵扇）kòng 人ê kha-chhng，人ê kha-chhng-hûn（尻川魂）就會飛走，滿月ê時，人ê kha-chhng-hûn會飛去月娘hia，人就會失去記持，完全成做妖怪。

廣志（A-sin ê老爸）kap美冴（A-sin ê老母）ê kha-chhng-hûn hō͘河童搶去，變做妖怪。原因是妖怪國ê蜈蚣妖怪百元門（ひゃくえもん，百衛門ê諧音），beh通過河童來奪取人類ê kha-chhng-hûn，百元門beh hō͘家己成做上強ê妖，統治妖ê世界kap人ê世界。Ūi-tio̍h beh kā 父母ê kha-chhng-hûn搶–tńg-lâi，A-sin、阿葵（A-sin ê小妹，0歲）kap阿白（A-sin ê狗仔）得著九尾狐妖怪（野狐，やこ）ê幫贊，分別變身成做無仝款ê妖怪，前往妖怪國核心ê何化妖怪城，beh拯救爸母kap人間！

妖怪原底tòa tī自然界，河邊、山邊、樹林內，mā有妖怪進入人間。野狐kap A-sin ê阿公銀之介是gín-á-phōaⁿ。M̄-kú，人類破壞妖怪khiā-khí ê所在，妖怪ê首領「熊田の長」決定封鎖妖怪世界通向人間ê入口，人類kap妖怪無法度互相交通。蜈蚣怪百元門ūi-tio̍h beh收集人ê kha-chhng-hûn，kā首領設立ê障害破壞，所以，有一寡妖怪hō͘大風吹入去人間無仝ê所在。本來親像「田無溝，水無流」，soah來起變化。

阮ang講「熊田の長」制限家己kap妖怪ê氣力，伊ê氣力比任何ê妖怪kap人攏大，妖ê能力比一般人厲害。總是，「熊田の長」無beh征服人間（濟濟電影ê主題是外星人怪物beh消滅人類á-sī對地球發動戰爭）。妖怪khiā-khí ê所在，顯明in比人tùi-tiōng自然。人tiāⁿ-tiāⁿ是破壞自然，beh濫糝用家己ê氣力。自然界屬tī啥人？Kám-sī kan-ta屬tī人？人kiám-thang免致意其他活物ê生存，kù-chāi人sûi-chāi去bú？妖怪ê世界kiám-chhái是「非人」ê世界，koh若親像屬tī自然界，是siāng-sî tī自然界kap bô tī自然界ê狀態，是流動–ê。

到底是啥人拍破界限、破壞徛起ê所在？是人á-sī妖怪ê氣力khah強？人驚妖怪。總是，妖怪mā明白人有氣力，所以，蜈蚣怪beh thong-kòe收集人ê kha-chhng-hûn來tit-tio̍h氣力。按呢，人kap妖怪ê分別是啥物？妖怪變做人ê形體，人失去ê kha-chhng-hûn了後成做妖怪。妖內面有人，人內面有妖，妖怪kap人是流動ê。

無論是人á-sī妖，攏有大氣力，攏tio̍h認識家己ê氣力，思考按怎運用、按怎tī自然ê中間生活。

關係人成做妖怪，電影有真趣味ê描寫。若是人執著某一種ê慾望，干焦beh為tio̍h彼ê慾望來生活，就會變做彼款ê妖怪，而且袂記得家己做人ê sî-chūn ê名，失去所有kap做人有關係ê記持。Hoán-tńg是本身就是妖怪ê野狐，因為會替別人想，所以首領beh kéng伊做繼承人，繼續帶領妖怪。Nā-sī人變做妖koh有人ê記持，親像廣志kap美冴初初變做妖怪ê sî-chūn，in有妖怪ê特殊能力，koh有人情味，對kiáⁿ-jî有保護kap疼惜。

無論是人á-sī妖，若是家己kap家己以外ê非人/非妖有結連，beh為對方來設法，人ê活命kap妖ê氣力就會向美善來發展；倒爿講，無論人á-sī妖，若是kan-ta beh成就家己ê慾望，氣力就會造成大破壞。用日本話來舉例，人必須是「人間」（にんげん），伊koh有第二ê層次ê意義，就是人品、性格、做人ê基本素質。若是對詞ê本身來看，人m̄-sī孤單ê存在，人ê存在是tī關係ê中間，人ê活命kap氣力ê運用，mā-sī tī關係ê中間teh運作，按呢，就來論後一个主題，纏絆kap結連。

這齣tī學生hioh-joa̍h、tńg-khì chng-kha ê時陣放送，實在有日本「百鬼夜行」傳說ê氣味。Tī台灣，真適合來思考中元節（參閱王崇堯〈中元節談福音可否改造文化〉，《台灣教會公報》3887期第17版）。逐種ê妖怪，攏有伊ê形狀、特質kap beh表達ê關係，tī chia舉例。

千幾年前到今，日本逐所在流傳無仝款ê「九頭竜伝承」，「熊田の長」就是一尾有九粒頭ê龍，伊是親像神ê妖怪，是聖kap氣力ê權威，代表對古早就有ê秩序，平衡自然萬物，是大地ê根基。

まめ太（豆太）ê形體是日本傳說ê化け狸（妖狸），tòa tī山野，會變化形體、kiâⁿ法術，伊有純真ê心，想beh kap人互動，kap A-sin做好朋友，mā-sī代先邀請A-sin去妖怪村–ê。

ピン子（平子）是アマビエ（A-má-pih，有記載講日本江戶時代肥後國─位置約略是tī今仔日ê熊本縣─出現ê人頭魚身ê動物）ê形體，生做古錐小隻，有大氣力。配音ê水瀬いのり講：「人kap妖，雖然族群kap生活無仝，總是心是仝款ê。」

野狐有九ê尾。Tī中國、日本、朝鮮有濟濟九尾狐ê傳說。Tī九州，當地流傳野狐變化成做人ê故事。Tī電影，九尾狐已經活五百冬，冷靜、聰明、有威嚴，gâu替人設想，一直teh設法人kap妖共生共存ê方法，伊變化成做查某gín-á ê形象，tī人間kap人交流，是銀之介gín-á時代ê好朋友，對人有情，對妖有義，對自然界有敬畏。

雨傘妖怪kap平子是妖狸ê同伴。日本傳說講，物件若是khǹg siuⁿ久，khǹg超過百冬，物件就會有靈魂，是活跳跳ê器具妖怪（つくも神），雨傘妖怪是siōng經典ê。

蜈蚣妖怪百元門變化成做長頭鬃ê查埔人，生做su-bûn su-bûn，是頭殼真好ê博士，ūi-tio̍h beh成做妖怪世界ê老大koh統治人間，siūⁿ khang siūⁿ phāng收集人ê kha-chhng-hûn。

蜘蛛精（じょろうぐも）是對百元門效忠ê下跤手，會kā人監視、用蜘蛛絲攻擊。

河童（かっぱ）執行百元門ê命令，負責提khoe-sìⁿ kā人kòng kha-chhng，收集kha-chhng-hûn，有一寡好笑，袂hō͘人討厭。日本有傳說講，河童會搶siû-chúi ê人ê尻子玉（kha-chhng內面ê球。實際上是虛構ê器官。現代醫學無發現人體有實際ê尻子玉），致到人失去元氣甚至tū–sí。

人變做妖ê因端，有ê是thong-kòe妖術，A-sin是kha-chhng妖怪（A-sin ê特色），阿葵是kim-sih-sih嬰仔妖怪、阿白是親像棉花糖ê狗仔妖怪。有ê是因為失去kha-chhng-hûn，人ê慾望kap特質用妖ê性質kap形體來表明，che mā hām人tī人間行踏ê sî-chūn teh塑造身份kap維持社會地位ê氣質有關係，比論講，廣志成做chhàu-mi-mo͘襪仔妖怪，臭味連洗溫泉也無法度去除，是「認真過生活ê記號」；美冴成做tōa kha-chhng歐巴桑妖怪；松坂先生是「妖怪─聯誼會o͘-pe̍h-bú」；幼稚園園長是「妖怪─o͘-jîn ba̍k-kiàⁿ」。

妖怪ê世界mā有野球比賽，表明發展關係kap結連有無仝款ê可能性。代先，水族妖怪（píⁿ-hî、jiû-hî……）m̄-sī咱食飯桌頂面排列ê sa-si-mih（さしみ）。野球是對重秩序、規則kap技能ê人類ê體育活動。用人類ê體育活動tī妖怪世界piàⁿ輸贏，phah-phòa對立二分ê人kap妖ê分別。

人kap tī人間hông chia̍h-sí-sí koh邊緣化ê水族妖怪輸贏，雙方攏有主動攻擊，mā有被動防守。印象上深ê是野狐用鈴木一郎ê招牌動作來準備，結果是三振，thang代表siōng自律ê人類ê失敗。（事實，kòng野球是失敗率真koân ê運動。）

時間有限，猶原堅持beh sńg。球場tī比賽ê時間，成做共生ê空間。人kap妖（水族）bô koh是對立kap剝削ê關係，是平等ê，遵守仝款ê規則，共同制定適合ê比賽時間（原底是九局，雙方約束，壓縮成做三局），輸贏以外，做伙歡喜，kā慾望化做kap thit-thô-phōaⁿ ê結連。Tī人間ê煙火大會成做百鬼夜行（真濟人成做妖怪）ê時，水族ê妖怪到人世，hoán-tńg揣無thang kòng野球ê所在kap同伴，tō koh tńg-khì妖怪ê世界。Tī妖怪ê世界，人kap妖tàu-tīn kòng野球，顯明這款機會雖莽珍貴koh稀罕，總是有出現ê可能。

電影ê路尾，眾人ê kha-chhng-hûn tńg-khì眾人ê身上。A-sin變成大太法師（日本傳說，身材kap氣力攏極大，創造富士山，性格善良）ê形體，thong-kòe野狐ê khoe-sìⁿ kap運用kap阿公細漢ê時用kha-chhng所表明ê活力來khah贏百元門。人kap妖合作，產生超越想像ê氣力kap活命，打敗自私自利、慾望無盡ê大妖。

每一個ê kha-chhng-hûn看起來攏仝款，m̄-ku，A-sin kā ba̍k-chiu kheh-kheh，thong-kòe氣味kap siàu-liām，kā屬tī伊kap爸母生活ê特殊記持揣出來，認得家己ê爸母。人間ê氣力，人間ê結連，tī家庭成員每一工互相saⁿ-thiàⁿ ê生活中間，包涵上卑微ê經驗，特別是鼻起來足臭ê氣味；hō͘咱討厭ê tāi-chì，hoán-tńg是lô-khó͘ phah-piàⁿ ê痕跡。道tī屎尿。疼tī臭臭ê襪仔kap變形走精ê身材，mā tī thit-thô ê中間顯明出來。

蜈蚣妖怪kap伊ê同伴雖罔失敗，m̄-koh無死失。Khoe-sìⁿê風hō͘世間人對這擺事件ê記持無去。這kám是夢？Kám有影？A-sin kā阿公早前hō͘野狐ê野球koh提tńg-khì hō͘阿公。60冬前，人kap妖有結連。阿公大漢，60冬過去，若親像斷去ê記持，因為孫仔來重新結連。人kap妖，非妖kap非人，beh按怎共存？球chit-tia̍p tī咱ê手頭。