台灣聖經網

阮對用台語講故事的淡薄回應

2020年11月04日

教會公報

推薦本篇新聞 : 0

阮非常感謝台灣教會公報社願意佇公共空間，用台語講故事冊，予囡仔有機會聽到台語講囡仔古。阮非常珍惜這個每禮拜六早時11點15準時開始的活動。因為台灣文學館、一般圖書館甚至書局，辦的不是華語就是英語講故事，用台語講故事的比用英語的較少。阮明白所有來講故事的人，攏是熱心的志工。阮亦知影來聽故事的人對八方前來，甚至有對安平騎車半點鐘來公報社聽台語故事。就算有一寡父母袂曉、無慣勢講台語，也願意利用這個空間及機會，與囡仔做伙聽台語故事。

但是有幾擺，志工的台語不輪轉。甚至佇咧講故事後，閣用華語來講解故事的內容。按呢，就佮用台語講故事的活動本質相衝突。阮知，有一寡志工的母語毋是台語，所以佇一寡所在有 tùn-teⁿ（停頓），一聽就是用台語直接硬讀華語的字詞，總是這些語詞佇台語無這種講法；亦有講故事的人當場表達故事中某一寡詞他也毋知……。總是，這款的代誌，是會當通過事前準備來避免的。

阮希望，主辦單位會當要求志工，除了熱情之外，也對重濟濟親自開費心神、時間，想欲聽台語故事的人的心意。阮希望志工講台語故事前愛先備課、多方請教，認真來維持這個台語講故事的珍貴活動。再次感謝公報社佮所有的志工，阮向望逐家的認真參與，予這個活動繼續延續。　（作者為基督徒）