【母語世界】蔡明憲講海外黑名單ê故事

Góa tńg–來ê時陣，足濟囡仔to̍h kā góa問講：「阿伯，阿伯。Ah你講烏名單，你面嘛無烏啊！你面按呢白白！」烏名單，是一ê特種ê記號。可能成千人，可能三、五千人，是彼tang-chūn戒嚴ê時代，國民黨講一kóa海外ê chiah-ê台灣人袂tàng tńg來台灣。因為in tī海外、tī美國、tī日本、tī加拿大、tī歐洲，甚至tī東南亞，全世界ê台灣人彼tang-chūn仔lóng去批評蔣介石、國民黨ê政府壓迫台灣基督長老教會彼三个宣言。1971年–ê，《國是聲明》。Chit ê聲明內底長老教會ê牧長講：「台灣í-keng實行戒嚴–ah，無人權，誠chē人í-keng無言論ê自由、信仰ê自由，甚至聖經mā先沒收，袂使講、唱台灣歌，當然閣khah無可能講政治–ê、批評政府ê chiah-ê言論。」1975年，《我們ê呼籲》，要求政府ài解除戒嚴，要求政府chaih-ê老賊tī中國選–出-來chiah-ê民意代表lóng七、八十歲–ah ài落台、ài全民改選。

1977年，發表《台灣基督長老教會人權宣言》，呼籲台灣政府ài實行真正ê民主自由公義ê社會、建立台灣，呼籲台灣政府hō͘台灣成做新而獨立ê國家。彼tang-chūn仔，高俊明牧師作總幹事，全台灣誠chē長老教會ê牧長抱tio̍h性命ê危險發表chit三ê宣言。Góa mā有問高牧師，講：「阮聽講恁誠chē牧師寫《國是聲明》ê時chūn lóng已經寫遺書，準備beh hō͘國民黨掠去關，甚至喪失性命。」伊kā góa講：「真chē牧長寫《人權宣言》 ê時chūn，大家攏覺悟。」我聽著足感動，足毋甘。所以彼tang-chūn góa tī加拿大ê Toronto a̍h美國台灣人ê教會、台灣人ê同鄉會，逐家聚會lóng為台灣teh祈禱，寫批。

蔣介石過身了後，換寫去hō͘ in kiáⁿ，蔣經國，講：「Lí ài實行長老教會總會所宣布ê chit三ê宣言，解除戒嚴，hō͘台灣成做真正一ê有人權、有信仰自由、言論自由ê社會。Hō͘台灣成做一ê新而獨立ê國家。」阮寫批，góa ka-tī mā寫批。阮lóng khah暗時下班以後拜六、禮拜，góa to̍h叫三五ê囡仔，十幾ê同鄉寫批hō͘蔣介石，寫批hō͘蔣經國講hiah-ê，ài實行民主自由國家、解除戒嚴，了後伊to̍h袂記–得-ah。阮chiah-ê寫批ê人lóng差不多半公開–ah lah。Tī教會mā知影講，「蔡某某ah閣有siáⁿ-mih人、siáⁿ-mih人，林哲夫教授阮lóng拜六、禮拜叫同鄉來hia寫批。」

有tang時仔來阮tau，蔡媽媽mā ài煮點心hō͘ hiah-ê同工食。去林哲夫教授ê厝，去hia寫批kah三更半暝。真正寄–ah，伊去寄到總統府，mā有誠chē教會ê兄姐寫批hō͘長老教會ê總會。所以彼ê時代，阮nā做教會ê長老、做教會ê牧師、做同鄉會ê會長，a̍h是……參加同鄉ê活動，去遊行、抗爭，人lóng有翕相。國民黨ê chiah-ê朋友lóng tī hia翕相，翕相to̍h做烏名單。烏名單to̍h sī án-ne，góa彼tang-chūn做加拿大台灣同鄉會ê會長，去Ottawa抗議、大使館抗議，彭明敏教授、謝聰敏受掠，就要求tháu放in。Hiah-ê千千百百ê關tī監牢ê政治犯，彼tang-chūn戒嚴時代死足chē。所以阮去遊行、去抗爭、去寫批，彼to̍h是國民黨彼tang-chūn仔ê所有海外ê 情治單位teh收集ê烏名單，m̄是kan-na收集góa，可能kan-na阮Toronto彼ê城市上少to̍h有20 ê、30 ê。Ah nā全美國、全加拿大、全日本、全歐洲，tàu tàu–起-來可能上少一千人，尾–á人講有三千人，閣有講五千人。Ah nā做烏名單以後lí to̍h袂tàng tńg來台灣–ah，無論lí有台灣護照，lí tī台灣出世，父母lóng tī台灣。阮tī海外，beh tńg來台灣袂tàng tńg–來。Lí ê護照to̍h kā lí取消，提台灣護照tńg–來ài閣號做「回國加簽」to̍h ài去代表處、大使館閣加簽。In nā講：「Ah lí che烏名單..蔡某某，lí烏名單，lí護照無beh加簽！」甚至kā lí取消。beh tńg來台灣ê簽證無beh hō͘–lí，che是烏名單ê待遇。1964年出國到轉來台灣，這中間góa有佇台南神學院做工。

1980、1982年ê時，美麗島事件soah了以後有tńg–來。彼tong時góa tńg–來厝–ni̍h，阮兜to̍h tī台中，樂舞台邊–á hia。阮老父kap老母mā lóng差不多七十幾歲–ah。看tio̍h便衣警察tī厝–ni̍h ê頭前án-ne 24點鐘tī hia顧，「Ah，lí足辛苦，入–來lim茶ā。」Hiah-ê警察kā阮老父講：「Ah，免lah！O͘-jí-sáng。Góa m̄是teh顧lí lah。Góa是teh顧恁kiáⁿ走–tńg-來。」In to̍h聽tio̍h siáⁿ-mih海外烏名單chông–tńg-來，ah to̍h有影góa chông–tńg-來，1972年góa偷偷仔tńg–來，mā感謝上帝引𤆬，1982年tńg–來。Tńg–來是為tio̍h beh 探親，tī機場去hông閘–落來。機場海關講：「Lí烏名單！所以lí tńg–來二禮拜了to̍h ài離開。」Hō͘ góa簽證二禮拜，tńg來探親。所以烏名單ho͘hⁿ，to̍h是因為台灣人tī海外、tī美國、tī加拿大、tī日本，全世界，阮要求台灣成做民主、自由、有人權ê一ê國家、一ê社會，足簡單是án-ne niâ。所以幾百人、幾千lâng袂tàng tńg–來。所以烏名單m̄是kan-na góa niâ，góa是khah戇膽，chông–tńg-來。坐飛行機ê時，tī góa祈禱ê中間上帝講：「恁tńg–來，恁tńg–來，去看恁ê父母，去看恁教會兄弟姊妹，tī獄中ê兄弟姊妹。」 （後期koh刊）