新馬地區土生華人e語言佮宗教信仰 ◎王桂蘭（臺師大臺文系博士生） (2014年07月07日)
故事ai對中國e明朝開始講起……
佇咧西元1405年7月11號（彼當陣是中國明朝永樂3年），鄭和奉明朝皇帝明成祖e命令落西洋，宣傳明朝e名聲兼促進海外e貿易。一直到1433年（中國明朝宣德8年），鄭和攏總落西洋7擺。28冬e時間，bat去過暹羅（泰國e舊名）、麻六甲、爪哇等等足濟所在。佇咧麻六甲，時間一下（ē）久，綴（toe）鄭和落西洋e人，有人開始佮在地e馬來女性通婚，踮遮（chia）釘根生湠（thoaⁿ）傳後嗣（thoan-hiō-sū）。佇這款e歷史背景下，由華人參（chham）當地e馬來女性通婚以後所生落--來e後代，查埔e就叫做「峇峇（Baba）」，查某囡仔號做「娘惹（Nyonya）」，合--起-來就是「土生華人（Peranakan）」。
除了鄭和落西洋以外，另外有關中國佮麻六甲e歷史牽連，佇馬來西亞e歷史冊《馬來紀年》內底有講--著：明朝e皇帝共（kā）漢麗寶公主賜婚予當時e麻六甲蘇丹，建立兩e國家和諧e關係。彼當時漢麗寶公主紮（chah）足濟下跤手人鬥陣去，包括有500 e查某𡢃（kan）。但是這段紀錄敢是正經e歷史？抑是干單（kan-na）是一種傳說？咱猶無法度百分之百確定。
土生華人分佈e範圍誠（chiaⁿ）闊，馬來西亞e檳城、麻六甲佮新加坡攏有。這兩e國家三e所在，也攏有土生華人e博物館通予人參觀，了解土生華人e歷史含（ham）文化。紲（soa）落來，咱著針對峇峇、娘惹in所講e話，信仰e宗教來做紹介。
土生華人既然是兩e族群結合e後代，毋管是佇佗一方面，自然攏會有原底族群e特性，猶閣有融合以後所產生e特殊文化。就語言方面來看，發展出福建話佮馬來話融合起來e「Baba Malay」。另外，嘛有其他e漢語方言參馬來話、英語融合起來e透濫語，若是欲講混合e pha-sian-to͘（パ－セント，百分比），又閣按無仝地區、方言群有所差別。Baba Malay語言e特色是：詞彙大多數保留福建話e講法，不而過語法方面煞（soah）是以馬來話為主。較序大e土生華人猶會當用紲拍（soa-phah）e Baba Malay來講話，但是少年一--輩-e著無法度囉（loh）！
峇峇、娘惹e宗教是多元豐富e。有維持傳統佛教、道教拜拜--e，也有落教信仰基督教、天主教--e。尤其，土生華人有足濟人攏有受西方e教育，對紅毛話（檳城叫英文是紅毛話）、基督教、天主教e接受程度嘛khah懸。佇新加坡參觀「土生華人博物館」（Peranakan Museum）e時，看著一塊趣味e佛龕（pu̍t-kham）。佛龕頂懸e雕刻，猶原是傳統代表好吉兆、長歲壽、有福氣e「龍」、「鳳」、「福祿壽」e圖。毋過（m̄ -koh）佇佛龕中央原底囥（khǹg）佛檫仔（hu̍t-chhat-a）e所在，變做是囥「聖家圖」，圖頂有畫耶穌、馬利亞佮約瑟e像！佛龕邊，博物館有貼一張說明e紙，寫講佛龕e來源，是對新加坡一間改信天主教e土生華人e家庭內底來e。這會當看出土生華人in佇宗教上e轉換、過渡期。閣來，佇一樓展覽廳e玻璃櫃nih，有展出「峇峇聖經」。按遮會當知影，彼當陣信仰基督教抑是天主教e土生華人已經有一定e數量。這陣踮佇新加坡e幾間仔教會內底，猶閣有人咧使用峇峇聖經、Baba Malay做禮拜，只不過人數佮較早是袂比並（pi-phēng）囉！
土生仔（tho͘-siⁿ-a），由無仝族群結合所生湠e後代，世界各國攏有例。除了新馬地區e「土生華人」，咱來看台灣，台灣khah早若是漢人佮當地原住民通婚生湠出--來-e，號做「土生囝」。閣比論講菲律賓，若是西班牙人佮菲律賓人通婚以後生e叫做「Mestizo」；漢人佮菲律賓人通婚生落來e是「Mestizo de Sangley」。中國澳門也有葡萄牙人參漢人e「土生葡人」。咱若是用欣賞e眼光來看，就會發現這款融合e族群性命力不止仔強，而且閣會綴（toe）著無仝e組合產生有機e變化。這寡仔演變出來e多元語言佮文化，每一款攏是獨一無二e，值咧咱來珍惜佮保存。
| ←前一篇 | 下一篇→ |