世界衛生組織曾提出「人ê健康」包含身體kap精神ê健康。檢驗一個人kám-ū健康，thang用「五kín（緊）三良」做標準。筆者用台語七字四句聯來詮釋。

1. 食飯會緊：偏食缺養快衰老，每日營養無潦草，至少三蔬kap二果，「食緊」表示食慾好。
2. 放屎會緊：大便小便放會空，放完感覺真輕鬆，多數老人尿歹放，「放緊」泌、腸有穩當。
3. 睏眠會緊：樂觀考慮無掛慮，上床緊睏好情緒，睏飽醒後精神有，「睏緊」無病無憂慮。
4. 講話會緊：講前內心有準備，思考敏捷講流利，表達內容有合宜，「講緊」腦清好思維。
5. 行路會緊：行路雙腳著保重，關節退化損功用，愛欲行緊著保養，「行緊」進取身體勇。

1.好ê性地：性地溫和無強求，為人處事顯溫柔，性質達觀無憂愁，「個性」良好好交流。
2.好ê處世能力：有夠能力辦公事，處理世事有遠慮，保持良好ê情緒，「處世」良好無辜負。
3.好ê人際關係：待人接物真圓滑，討論商量無衝突，寧願剋虧kap委屈，「人際」良好bōe鬱悴。

1.五緊三良：食濟睏飽閣好放，人際良好閣gâu講，個性良好閣piàn-kiâⁿ（遍行），處世良好攏tit-chiâⁿ。
2.增加靈命：人類拜神真顯明，世衛提出是欠「靈」，身kap心靈攏經營，靈命寶貴是永恆。