【母語世界】溫暖 ê 滋味

天猶bōe光，tō聽著灶跤灶頭ê水槽邊，洗米洗菜ê水流聲。有一个熟似ê背影tī灶台前，he to̍h是阿母，美雲仔。

為著beh hō͘逐家食tio̍h燒燙燙ê早頓，天拍殕光to̍h開始攢辦kui家口ê三頓，水道頭ê水真無閒，一直流一直流無時間通停。鼎鍋仔tī gá-suh爐仔頂，親像老歲仔leh講古，紅紅ê火舌，nā-tio̍h烏鉎ê鼎底。

燒氣ê煙開始chhèng tī空氣中，親像猴齊天ê筋斗雲。大鼎欲熱，油ài落hō͘ tio̍h時，蒜頭一落鼎，爆出kui間ê芳 。He是世間上幸福ê氣味。

煎匙tī鼎底反來反去，親像leh泅水ê魚，悠哉悠哉，攏無驚惶。

阿母ē-sái 講是手路神，毋免磅仔，準頭真好，一chhok鹽，一拈蔥仔珠，紲手sám–loeh氣味tō拄拄好，He是幾十冬ê日子練出來ê真功夫。

魚仔一落鼎底油tō chhā-chhā叫，煎kah赤芳赤芳皮chiah會酥。聽tio̍h tō腹肚攏iau起來，鼻tio̍h喙瀾tō beh流出來。

毋免用複雜ê芳料，kan-na有單純ê鹽芳食出海洋ê好滋味。菜脯卵煎kah金黃赤赤、外面酥內面軟，內底ê菜脯咬tio̍h脆脆，魚芳兼卵芳芳kah溢出門窗。

煮食，是kā酸甜苦辣，lóng摻做伙。大火ài猛，勻勻仔火ài煨，火候ài顧kah拄拄好。阿母教咱做人做代誌，嘛是chit款道理。沓沓á來，寬寬仔á是，定著心肝勻勻仔炊。時間若到，自然有上甘甜ê一鼎湯。 規家伙仔圍tī飯桌仔墘，弄箸動碗，一碗khiū-teh-teh ê白飯，kap一碗燒唿唿ê菜湯。毋但是人世間ê好滋味，koh khah是阿母tùi阮chit ê家一世人ê照顧，是人世間上飽足、上滿足、上溫暖ê阿母ê滋味。