【母語世界】養心ê環境

毋是逐人攏有幸佇一个健康溫暖ê環境大漢。這kap一个家庭ê貧富無關係。真濟散赤人雖然愛為著生活犧牲拍拚，佇精神上嘛是ē-tàng hō͘囡仔上大ê鼓勵kap保護，chhiâⁿ-ióng出樂觀堅強ê ē-chi̍t-iân（下一沿）。嘛足濟好額人hō͘囡仔食好穿好，煞對in歹喙歹舌，嫌東嫌西，四界蹧躂，造成囡仔精神上ê負擔kap後擺人格ê扭曲。

話實在bōe-tàng按呢講。時代確實是無仝矣！每一个年代攏有新ê發見、新ê智識，嘛有較進步ê做代誌ê方式kap觀點。Bōe-su咱chit-má嘛無可能猶閣想欲用一百冬前ê西方醫藥學認知和技術來看診，合藥仔kap做手術。雖罔彼陣馬偕牧師幫贊真濟人解決嘴齒痛ê問題，毋過chi̍t-má敢猶閣有人會kā蛀齒攏總挽落來當作醫治嘴齒痛ê方式？

咱對身體上ê病症通常攏真願意接受而且期待上新上先進ê研究智識和技術，m̄-koh煞無法度改變咱對心理症頭和精神健康ê看輕。敢是因為咱kā精神問題看做是真見笑，真卸面子ê代誌？抑是咱早著慣勢遮瞞心理症頭，袂使hō͘人知？咱感覺心理健康是會當用意志去改善ê。袂好ê人tō是伊無夠拍拚，家己無誠實想欲好起來。若有影按呢，是按怎會有遮爾濟改善精神問題ê藥仔？

根據現代ê學術研究，心理健康和身體健康是仝款重要ê。對基督徒來講，咱暫且kā靈魂ê健康摻做心理健康ê一部分。咱愛知影心理kap身體是互相影響–ê。鬱卒ê人，身軀症頭絕對好袂緊。定定破病ê人嘛容易得著鬱症。精神影響身體，所以聖經講：「歡喜ê心是好藥；憂傷ê心神hō͘骨枯焦。」(箴言17章22節)

哈佛大學研究報告講一个人ê出脫kap伊ê「情商」（EQ）上有關係。Koân EQ閣是ùi健康ê自尊心來ê。每一个囡仔攏需要知影伊是無條件hông接受kap疼惜ê。序大人對伊好毋是因為伊𠢕讀冊，𠢕做代誌，抑是hó-chhùi-táu。序大人疼伊tō是因為伊是伊，無別个理由。真濟序大人掠準疼惜ê心意毋免講出喙，囡仔自動就會知。這真正是一个過時閣錯誤ê觀念。一个毋捌聽過關心ê話，干焦聽過lóe-mē ê囡仔是無可能感覺家己真好，抑是有自信。

我細漢時tō定定感覺家己逐項代誌攏做袂好。一直到高中佇美國tú-tio̍h一个古巴猶太人老師 Lieberman女士。佇伊ê目睭內底，我頭擺看著家己ê價值。準講我講毋著話，做毋著代誌，伊嘛攏是笑面耐心對待。連我卒業了後，伊嘛年年寫批，甚至寄所費hō͘我。伊ê兩個囡仔知影伊對我ê關愛，煞嘛kā我當做姊妹，完全無赤目ê腸肚。我知影是Lieberman女士hō͘我ê自信，我才有勇氣一路讀kah博士，盡力佇我想欲做ê代誌拍拚。