本新聞提供者: 教會公報
【完整新聞及原始連結】
幾 nā 月日前，阮牧師娘接著一 ê 通知講，in hit 屆（1964年畢業）台南神學院音樂系 ê 北美同學 beh tī 5 月底至 6 月初開北美同窗會。伊非常歡喜，因為這是 in 畢業了後 50 冬來 ê 頭一擺。雖然同窗會是 beh tī 阿拉斯加 ê 郵輪頂面舉行，這條路線阮已經去過三擺了。總是伊想著 in ê 一寡同學對畢業到今 lóng 猶袂 koh 見過面。伊就隨時放棄ほ時間 koh 已經報名了 ê 台灣花女同窗會 ê 行程，改變目標報名參加南神同窗會。
這擺同窗會由蕭美媛姊發起招集。In hit 屆是台南神學院音樂系有史以來學生人數傷濟 ê 一屆，有 15 ê 人，破南神招生 ê 記錄。In 畢業後移民來北美 ê 同學有九位， 除了一位傷慢聯絡著，袂赴報名來參加以外，其他 ê lóng 總有來參加。有頂下屆 ê 校友聽著消息，mā 要求 beh 參加，所以，包括 in tòe-tīn ê 丈夫 kap 頂下屆 ê 校友 lóng 總有二十外人。
In 這班 ê 同學 hiàng-tang-sî tī 南神校園真出風頭。In 逐人音樂 ê 底致 lóng 真好，逐人 lóng 會彈 koh 會唱，hō͘ 學院 ê 聖歌隊水準提高，連大小禮拜 ê 奏樂、吟詩 lóng khah 好聽。這 15 位各有恩賜 ê 女同學 tī 南神讀冊 hit 幾年。In 開音樂會，演歌劇，校園內 ê 生活變了 koh-khah 多采多姿。
經過半 ê 世紀，二十出頭 ê 小姑娘年紀 lóng 超過半百，也已經 lóng 做阿嬤。總是大家聚集做伙，猶是 hiah-nih-á 天真可愛。講起過去少年時 ê 代誌，南神時代學生生活 ê 氣味 lóng 走出來。發起招集 kap 聯絡 ê 美媛姊，in 封伊做班長，安排每一日暗頓 lóng 做陣食飯，每日早起也有一點半鐘 ê 分享時間，做伙分享每一 ê 人畢業後 ê 侍奉生活 kap 經驗，其他 ê 時間自由活動。若郵輪靠岸，in 大家 lóng 放棄分別參加特別景點遊覽（excursion），寧可結做堆，鬥陣包計程車遊覽或是做伙 tī 郵輪靠岸 ê 市區散步走街路。
每日早起 ê 分享時間最寶貴，每一日輪流有4∼5人分享。In 分享 in ê 家庭 kap in ê 工作生活。雖然 lóng 是過去 ê 代誌，分享著趣味快樂 ê 時陣，大家哈哈大笑，分享著遭遇苦難失敗 ê 時陣，大家也流目屎互相安慰。
上有意思，mā 上有意義 ê 是每一 ê 人 lóng 用真濟時間分享 in ê 信仰生活 kap 侍奉。In lóng 證實台南神學院 ê 教育不但培養 in ê 信仰，也造就 in ê 宗教音樂技藝。神學院信仰生活 ê 操練互 in tī 厝內建立基督化 ê 家庭，tī 教會侍奉主：做教會音樂 ê 領導者，志願 tī 禮拜中司琴，指揮聖歌隊，帶領敬拜讚美。也有人被選做長老、執事、牧師娘。In 也教主日學、帶領查經班、有時也著講道理。
In 畢業後，有人去學校做音樂老師；有人應美國教會聘做教會音樂主任；有人應邀指揮台灣同鄉 a̍h 是社區 ê 合唱團，tī 台灣人節日慶典 a̍h 是社區活動中演唱。也去美國人 ê 學校、醫院、養老院、商場表演，開音樂會等等。對內幫助台美人保存台灣音樂與傳統；對外宣揚台灣文化，也做國民外交。In tī 職場、社區做有力 ê 見證。逐 ê 人「學有所用」，對教會 kap 社區 ê 貢獻相當大。In 是台南神學院 ê 光榮。
這 ê 同窗會特別互人感動 ê 是 in 這些南神畢業生 lóng 認同台南神學院 ê 宗教音樂教育。因為 in tī 台南神學院所受 ê 宗教音樂對 in ê 基督教信仰 kap 生活有真大功效 kap 幫贊，也培養 in 侍奉主 kap 伊 ê 教會。我旁聽 in ê 分享 mā 受著真大 ê 感動。感受著這 ê 南神畢業生 lóng 有真好 ê 信仰，in ê 音樂侍奉對教會 kap 社區貢獻真大。In 每一 ê 人 ê 分享 lóng 親像一篇美好 ê 見證。我真正為著 in 來感謝上帝。
台灣聖經網酷卡開放免費索取，歡迎多加利用!
NIV
靈修
新聞
貼圖
為教會
協進會籲為浙江教會禱告 促地方政府尊重宗教自由
完整新聞照片錦集