幸福台南城

台17線
濱海北 peng 是北門　紅樹林 e 大眠床
金河醫生好心腸　醫心醫病安家庄（1）

北門落南是將軍　棉被製造上專門
將軍漁港等漁船　烏魚 hō͘ 阮大出運

將軍落南是七股　烏面 lā-poe 愛保護
鹽山鹽田好旅途　台江內海遊瀉湖

七股落南是安平　古堡是歷史見證
老街繁華百業興　追想歌曲唱真情（2）

台19線
台十九北 peng 鹽水　十九甲線 chia 分開
橋南老街刀相隨　頭家話 sap 一大堆（3）

鹽水落南是學甲　頑皮世界動物家（ka）
濕地生態鳥類早　虱目魚丸食 kah 飽

學甲落南是佳里　蕭壠園區好景緻
驛站農場媠無比　梧母煮食好口味

佳里落南是西港　西港大橋有夠紅
劉家古厝巧美工　郭家宗祠傳希望

西港落南市中心　一寸土地一寸金
若無先人來致蔭　只好歸隱 toa 山林

台19甲
十九甲北 peng 鹽水　蜂炮 teh 彈像霆雷
永成戲園真寶貴　台灣詩路有智慧

鹽水落南是下營　鵝肉蠶絲上出名
烏豆是阮 e 阿娘　營前彩繪 tī 門埕

下營落南是麻豆　麻豆文旦好落喉
真理大學設分校　老街真 chē 西洋樓

麻豆落南是善化　牛隻買賣牛墟 hoah
親水公園樹蔭闊　糖廠食冰兼唱歌

善化落南是新市　古文物南科遺址
先人文物 chia 出世　文化資產愛保持

新市落南是新化　來到老街 m̄-thang 趕
新化分局用心看　警察帽仔厝頂蓋（4）

新化落南是關廟　beh 食滷麵愛趁燒
北寮老街 tiam-chia hioh　來看彩繪愛相招

台1線
台一北 peng 是後壁　烏樹林站坐火車
菁寮老街愛來行　崑濱伯仔 toa tī-chia

後壁落南是新營　台南縣府設 tī-chia （5）
天鵝湖邊親子埕　鐵路園區真時行

新營落南是柳營　奶牛 e 厝 tiam tī-chia
八老爺車頭 chhiaⁿ-iāⁿ　南元農場生態營

柳營落南是官田　菱角田園規大片
水雉園區鳥隻現　藝術大學來結緣

官田落南是善化　bih-luh 清涼凍心肝
農產中心佔地大　各種特產在你 kōaⁿⁿ

善化落南是新市　19甲台一交叉枝（6）
科學園區阮厝邊　工作環境真 su-sī

新市落南是永康　南市人口我稱王
教育公園來運動　永保全民攏安康

永康落南是市區　現代行業逐項有
若有需要來市府　工作人員會服務

小北百貨貨色 chē　生活用品 ta̍k 項賣
小北夜市點心 kha　保證 hō͘ 你食到飽

荷蘭起造赤崁樓　軍事政治 e 嚨喉
赤崁樓前是孔廟　文化古蹟愛保惜

國立台灣文學館　古蹟保留是永遠
文學文化 e 示範　記載歷史真完全

教會上早太平境　大愛馬雅各醫生
醫病宣教無時停　教人 bat 字讀聖經（7）

台灣教會公報社　上早報紙設 tī-chia （8）
白話字 e 大本營　教會史料 e 大廳

市區落南是仁德　保安車頭是古蹟
奇美博館有特色　台一南 peng 到仁德

台3線
台三北 peng 是楠西　上蓋出名梅仔雞
梅嶺風景真美麗　曾文水庫旅客 chē

楠西落南是玉井　soāiⁿ-a 有黃嘛有青
白色教堂有風格　方舟教會是聖地

玉井落南是南化　來去烏山 hō͘ 猴看
龍眼咖啡助消化　chia-e 名產 soāiⁿ-a 乾

台南是幸福城市　美景古蹟滿滿是
大凍山頂接天邊　港口有蝦嘛有魚

火車載你四界去　公車山區到海邊
有船嘛有飛行機　歸仁大潭有高鐵

台南真有人情味　多數 e 人講台語
古錐熱情閣客氣　歡迎來做阮厝邊

【註】
（1）北門王金河醫生，醫治真 chē 烏跤病患者，nā tu-tio̍h 生活艱苦 e 人 m̄-nā 無提醫藥費，koh 會幫贊患者家庭 e 需要。
（2）追想歌曲是指〈安平追想曲〉這條歌。
（3）Tī 鹽水 e 橋南老街，有 chi̍t-e 賣刀 e 頭家，teh 紹介刀 e 時真厚話。
（4）新化警察分局 e 厝頂，是一頂警察帽仔。
（5）台南縣市猶未合併進前，台南縣政府 tī 新營。
（6）台19甲線 kap 台1線 tī 新市交叉，親像一支鉸刀。
（7）「教人 bat 字」是指白話字。
（8）台灣第一份報紙是《台灣府城教會報》，ia̍h 著是 chit-ma e 《台灣教會公報》。